Plantun de Prouvènço

Pèr coumpara dos planto d'encò nostre

Primula farinosa & Picea abies

Primula farinosa

Primulaceae

Nom en français : Primevère farineuse.

Descripcioun :
Dins la Tiniò, ié dison "las flours-de-Jano-d'Arc" (J.-L. Domenge in LMT, op.cit. p. 60). Es uno primadello dindouleto di flour roso emé lou centre jaune e blanc, que trachis dins li pelouso e li prado bagnado d'auto mountagno. Li fueio, touto basalo, soun quàsi ouvalo e merletado.

Usanço :
Couneissèn pas d'usanço particuliero pèr aquelo planto. La racino caup de sapounino. Escriéure au site se n'en sabès mai.

Port : Erbo
Taio : 5 à 30 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Primula
Famiho : Primulaceae

Ordre : Ericales

Coulour de la flour : Roso
Petalo : 5
Ø (o loungour) flour : 1 cm
Flourido : Printèms - Estiéu

Sòu : ca
Autour basso e auto : Pancaro entresigna
Aparado : Noun
Mai à jun

Liò : Prado umido - Bas-palun
Estànci : Subaupen
Couroulougi : Éurasiatico
Ref. sc. : Primula farinosa L., 1753

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.